Apretar os dentes, pechar os ollos con
forza e plantarse segura no chan co vento dándonos na cara, a piques
de nos derrubar, agardando que pase o furacán, é resistir, si, pero
non abonda con iso. Reistir tamén é actuar. Dar un paso cara a
adiante, malia que o vento nos bote para atrás. Dar outro paso aínda
que creamos que vamos saír voando. E dar outro paso máis ata chegar
onde queremos chegar. Aínda que ao vento se lle sume choiva, ou
pedruscos coma pelotas de golf. As pelotas de golf son moi duras e
pesadas. Son un pesadelo, se pensamos nelas caíndo do ceo sen
piedade. Pois aínda que esas pelotas caísen de arriba, resistir non
é meterse baixo dun soportal e agardar que pase para despois
continuar o camiño.
E pensaredes que estou falando de máis
do tempo. Pero non falo do tempo. Falo de quen queda sen traballo e
cre que resistir é chegar a fin de mes sen morrer de fame,
consieguindo pagar o aluguer, a luz, a auga e a comida cos 426€ de
merda que dan de subsidio (e que non nos quiten esa limosna!). Falo
de quen non pode pagar o alugueiro e cre que resistir é non saír da
casa para que o dono/a non veña e troque a pechadura.
Porque se estás sen traballo e
cobrando o subsidio (quen o cobra) ou se estás a nada de perder a
casa e te conformas con todo iso que contei, pode pasar que te
acostumes e nunca saias a loitar por algo mellor do que tes, iso que
tanto temes perder e que se cadra é o que te ata a unha vida (case)
miserábel. Se cadra, só se cadra, hai que loitar por conseguir
máis, arriscar o que xa se ten, non si? Se perdes, perdes unha
propiedade, un soldo... E perdes tamén o medo de quedar sen eles. E
gañas a liberdade de non depender dese soldo, desa propiedade, gañas
tranquilidade.
Soa perigoso, verdade? Si, hai que ser
moi valente para resistir. Ninguén dixo que fose doado.
No comments:
Post a Comment